మోమోస్, బర్గర్, శాండ్విచ్, ఫ్రెంచ్ ఫ్రైస్... వీటితో పాటు మయోనైజ్ (Mayonnaise) ఉంటే ఆ మజాయే వేరు. క్రీమీగా, ఎంతో రుచిగా ఉండే దీనిని చాలామంది ఇష్టంగా తినేస్తుంటారు. రుచికి బాగుంది కదా అని దీన్ని రోజూ లేదా మోతాదుకు మించి తినడం వల్ల ఆరోగ్యానికి తీవ్ర నష్టం వాటిల్లుతుందని నిపుణులు హెచ్చరిస్తున్నారు.
మార్కెట్లో దొరికే మయోనైజ్లో క్యాలరీలు, కొవ్వులు, ఉప్పు, ప్రిజర్వేటివ్స్ అధికంగా ఉంటాయి. ఇవి బరువు పెరగడం దగ్గరి నుంచి గుండె సమస్యల వరకు దారితీస్తాయి. మయోనైజ్ అధికంగా వాడటం వల్ల కలిగే నష్టాలేమిటో ఇక్కడ తెలుసుకుందాం.
మయోనైజ్ ఎక్కువగా తింటే ఏమవుతుంది..?
బరువు పెరుగుతారు: మయోనైజ్లో క్యాలరీలు, కొవ్వు శాతం చాలా ఎక్కువుగా ఉంటుంది. మోమోస్, బర్గర్ వంటి హై-క్యాలరీ జంక్ ఫుడ్తో కలిపి దీన్ని తిన్నప్పుడు శరీరంలో అనవసరమైన కొవ్వు పేరుకుపోతుంది. దీన్ని తరచుగా తీసుకుంటే సులభంగా ఊబకాయం బారిన పడతారు.
గుండెకు చేటు..మార్కెట్లో లభించే మయోనైజ్ తయారీలో రిఫైండ్ ఆయిల్స్, శాచురేటెడ్ ఫ్యాట్స్ (సంతృప్త కొవ్వులు) ఎక్కువగా వాడుతుంటారు. వీటిని అతిగా తీసుకుంటే రక్తంలో చెడు కొలెస్ట్రాల్ (LDL) స్థాయిలు పెరుగుతాయి. దీర్ఘకాలంలో ఇది గుండె సంబంధిత వ్యాధులకు దారితీస్తుంది.
రక్తపోటు ముప్పు.. ప్యాకేజ్డ్ మయోనైజ్ ఎక్కువ కాలం నిల్వ ఉండటానికి, రుచిగా ఉండటం కోసం సోడియం ఎక్కువగా కలుపుతుంటారు. దీనివల్ల శరీరంలో సోడియం స్థాయిలు పెరిగి, రక్తపోటు (bp) సమస్యలు వచ్చే ప్రమాదం ఉంది.
ఇందులో ఉండే అధిక కొవ్వు కారణంగా జీర్ణవ్యవస్థపై భారం పడుతుంది. కొందరికి దీన్ని తిన్న వెంటనే గ్యాస్, ఎసిడిటీ, అజీర్తి, కడుపు ఉబ్బరం వంటి జీర్ణకోశ సమస్యలు తలెత్తుతాయి.
పూర్తిగా మానేయాలా..?
మయోనైజ్ను పూర్తిగా మానేయాల్సిన అవసరం లేదు. కానీ, అప్పుడప్పుడు పరిమిత మోతాదులో మాత్రమే తీసుకోవాలి. బయట దొరికే వాటికి బదులుగా పెరుగుతో చేసిన డిప్స్, ఇంట్లో సహజ సిద్ధంగా తయారుచేసిన మయోనైజ్ లేదా తక్కువ కొవ్వు (Low-fat) ఉండే ప్రత్యామ్నాయాలను ఎంచుకోవడం ఆరోగ్యానికి మేలు చేస్తుంది.
ఈ జాగ్రత్తలు తప్పనిసరి..
ప్రతిరోజూ జంక్ ఫుడ్తో పాటు మయోనైజ్ తినే అలవాటును మానుకోవాలి.
మార్కెట్లో కొనుగోలు చేసేటప్పుడు లేబుల్ చదివి, తక్కువ సోడియం తక్కువ ఫ్యాట్ ఉన్నవి ఎంచుకోవాలి.
ఫాస్ట్ ఫుడ్స్ తినేటప్పుడు వాటి ప్రభావాన్ని తగ్గించడానికి కచ్చితంగా తాజా కూరగాయల సలాడ్స్ తీసుకోవాలి.
ముఖ్యంగా పిల్లలకు జంక్ ఫుడ్, మయోనైజ్ వంటివి ఎక్కువగా అలవాటు చేయకూడదు. ఇంట్లో చేసిన ఆరోగ్యకరమైన స్నాక్స్ ఇవ్వడానికి ప్రాధాన్యం ఇవ్వాలి.