ఉదయం తాగే టీ కావచ్చు, పండుగలకు చేసుకునే పిండివంటలు కావచ్చు.. భారతీయ వంటగదుల్లో బెల్లానికి ఎప్పుడూ ప్రత్యేక స్థానమే ఉంటుంది. భోజనం చేశాక కాస్త బెల్లం ముక్క నోట్లో వేసుకునే అలవాటు చాలా మందికి ఉంటుంది. అయితే ఇటీవల కాలంలో తెల్ల చక్కెర (White Sugar) కంటే బెల్లం వాడకం ఆరోగ్యానికి చాలా మంచిదనే భావన ప్రజల్లో విపరీతంగా పెరిగిపోయింది. పంచదారకు ప్రత్యామ్నాయంగా ఏరికోరి మరీ ఆర్గానిక్ బెల్లాన్ని ఆశ్రయిస్తున్నారు. అయితే, నిజంగానే చక్కెర కంటే బెల్లం సురక్షితమేనా..? ఈ 'స్వీట్' విషయాల్లో దాగున్న అసలు నిజమేంటో చూద్దాం..!
తయారీ.. పోషకాల సంగతేంటి..?
చెరకు రసాన్ని లేదా తాటి కల్లును (తాటి రసాన్ని) బాగా మరిగించి, గట్టిపడేలా చేయడం ద్వారా సహజ పద్ధతిలో బెల్లాన్ని తయారు చేస్తారు. అదే తెల్ల చక్కెర విషయానికి వస్తే.. అది ఎన్నో రసాయన ప్రక్రియల (Refining Process) ద్వారా తయారవుతుంది. బెల్లాన్ని ఎక్కువగా ప్రాసెస్ చేయరు కాబట్టి, అందులో ఇనుము (ఐరన్), క్యాల్షియం, పొటాషియం వంటి ఖనిజ లవణాలు (Trace Minerals) కొద్ది మొత్తంలో సజీవంగా ఉంటాయి.
కానీ ఇక్కడ గమనించాల్సిన విషయం ఒకటుంది. మన శరీరానికి రోజువారీగా అవసరమయ్యే పోషకాలను కేవలం బెల్లం ద్వారానే పొందాలనుకోవడం పొరపాటే. బెల్లంలో ఉండే ఈ ఖనిజాల శాతం చాలా తక్కువే కాబట్టి, పోషకాల కోసం దానిపై ఆధారపడకూడదు.
అతిపెద్ద అపోహ ఇదే..!
బెల్లంలో అసలు షుగర్ ఉండదు, దీన్ని ఎంత తిన్నా క్యాలరీలు పెరగవు అని చాలామంది అపోహ పడుతుంటారు. కానీ వాస్తవానికి బెల్లం కూడా ఒక రకమైన చక్కెరే! తెల్ల పంచదారలో ఎన్ని క్యాలరీలు ఉంటాయో, దాదాపు అదే స్థాయిలో బెల్లంలోనూ ఉంటాయి. పోషకాలున్నాయి కదా అని బెల్లాన్ని మోతాదుకు మించి తింటే.. అది కూడా శరీరంలో క్యాలరీలను పెంచేస్తుంది. మిగతా తీపి పదార్థాల లాగానే ఇది కూడా రక్తంలో చక్కెర స్థాయిలను (Blood Sugar Levels) వేగంగా పెంచుతుంది.
పరిష్కారం ఏంటి..?
అలాగని బెల్లాన్ని పూర్తిగా పక్కన పెట్టాల్సిన అవసరం లేదు. తెల్ల చక్కెరతో పోలిస్తే.. తక్కువ ప్రాసెసింగ్ జరగడం వల్ల, కాస్తో కూస్తో ఖనిజాలు ఉండటం వల్ల బెల్లం కొంతవరకు మెరుగైన ఎంపికే అనడంలో సందేహం లేదు. కానీ, ఇక్కడ గుర్తుంచుకోవాల్సిన అసలు సిసలైన మంత్రం 'మితంగా తీసుకోవడం'.
మీరు టీలో చక్కెరకు బదులు బెల్లం వేసుకున్నా సరే.. మొత్తంగా రోజులో తీసుకునే తీపి పదార్థాల శాతాన్ని తగ్గించుకోవడమే సరైన ఆరోగ్య సూత్రం. కేవలం చక్కెరను మానేసి, దాని స్థానంలో బెల్లాన్ని వాడినంత మాత్రాన మన ఆహారపు అలవాట్లు అమాంతం ఆరోగ్యకరంగా మారిపోవు. మీరు ఏ స్వీటెనర్ వాడుతున్నారన్నది కాదు, 'ఎంత మోతాదులో వాడుతున్నారు' అన్నదే మీ ఆరోగ్యాన్ని నిర్ణయిస్తుందని నిపుణులు స్పష్టం చేస్తున్నారు.