వర్షాకాలం రాగానే వంటగదిలో ప్రధానంగా ఎదురయ్యే సమస్య మసాలాలు, ఉప్పు మెత్తబడటం. గాలిలోని తేమ కారణంగా ఉప్పు గట్టిపడటం, మసాలా దినుసుల సువాసన తగ్గడం, ఒక్కోసారి బూజు పట్టడం వంటివి జరుగుతుంటాయి. ఇలా పాడైన వాటిని పడేసి మళ్లీ కొనాలంటే జేబుకు చిల్లు పడటమే కాకుండా, వంటల రుచి కూడా దెబ్బతింటుంది.
మీ వంటగదిలోని మసాలాలు ఎక్కువ కాలం తాజాగా, పొడిగా, సువాసనతో ఉండాలంటే కొన్ని సులభమైన ఇంటి చిట్కాలు (Desi Tricks) పాటించడం చాలా అవసరం. అవేంటో ఇప్పుడు తెలుసుకుందామా..?
1. గాలి చొరబడని (Airtight) డబ్బాలనే వాడాలి..
మసాలాలు, ఉప్పును ఎప్పుడూ నాణ్యమైన గాజు (Glass) లేదా ఫుడ్-గ్రేడ్ ప్లాస్టిక్ ఎయిర్ టైట్ డబ్బాల్లోనే నిల్వ చేయాలి. గాలి, తేమ లోపలికి వెళ్లకుండా వాడిన ప్రతిసారీ మూత గట్టిగా బిగించాలి. తడి చెంచాలను అస్సలు వాడకూడదు. చిన్నపాటి తేమ తగిలినా డబ్బాలోని మసాలా మొత్తం పాడయ్యే ప్రమాదం ఉంది.
2. ఉప్పు డబ్బాలో కొన్ని బియ్యం గింజలు..
ఇది మన పెద్దలు తరచుగా పాటించే పాత, ఎంతో ప్రభావవంతమైన చిట్కా. ఉప్పు డబ్బాలో 8 నుంచి 10 పొడి బియ్యం గింజలు వేయండి. బియ్యం అదనపు తేమను పీల్చుకుంటాయి, తద్వారా ఉప్పు గట్టిపడకుండా ఎక్కువ కాలం పొడిపొడిగా ఉంటుంది. అయితే, వేసే బియ్యం పూర్తిగా పొడిగా ఉండేలా చూసుకోవాలి.
3. లేత ఎండలో ఆరబెట్టడం..
పసుపు, ధనియాల పొడి, కారం లేదా గరం మసాలా కాస్త మెత్తబడినట్లు అనిపిస్తే, వాటిని ఒక శుభ్రమైన ప్లేట్లో పలుచగా పోసి కొద్దిసేపు లేత ఎండలో ఉంచండి. దీనివల్ల వాటిలోని తేమ ఆవిరైపోయి సువాసన తిరిగి వస్తుంది. అయితే, మరీ ఎక్కువసేపు ఎండలో ఉంచితే వాటి సహజ రంగు, రుచి పోయే ప్రమాదం ఉంది కాబట్టి జాగ్రత్త వహించాలి.
4. వంటగదిలో గాలి ఆడేలా చూసుకోవాలి..
వంటగదిలో ఎప్పుడూ తేమ ఉంటే మసాలాలు త్వరగా పాడవుతాయి. కాబట్టి కిచెన్లో గాలి, వెలుతురు బాగా వచ్చేలా (Ventilation) చూసుకోవాలి. వంట చేసేటప్పుడు వచ్చే ఆవిరి బయటకు పోవడానికి ఎగ్జాస్ట్ ఫ్యాన్ వాడటం మంచిది. అలాగే, మసాలా డబ్బాలను గ్యాస్ స్టవ్ లేదా సింక్కు బాగా దగ్గరగా ఉంచకండి.
మరికొన్ని ముఖ్యమైన సూచనలు..
తక్కువ మొత్తంలో కొనుగోలు..వర్షాకాలంలో మసాలాలను ఒకేసారి ఎక్కువగా కాకుండా, తక్కువ మోతాదులో (Small batches) కొనుగోలు చేయడం ఉత్తమం.
సరైన ప్రదేశంలో నిల్వ...డబ్బాలను నేరుగా ఎండ పడే ప్రదేశాల్లో లేదా బాగా వేడిగా ఉండే చోట ఉంచకూడదు. చల్లని, పొడి ప్రదేశంలో నిల్వ చేయాలి.
డబ్బాల శుభ్రత.. మసాలా డబ్బాలను ఎప్పటికప్పుడు శుభ్రం చేసి, పూర్తిగా ఆరిన తర్వాతే వాటిలో సరుకులు పోయాలి.
పొడి చెంచాల వినియోగం.. ఉప్పు, మసాలాలు తీయడానికి ఎప్పుడూ పొడి చెంచాలనే ఉపయోగించాలి.
పాడైతే వాడకండి.. ఒకవేళ మసాలాల నుంచి చెడు వాసన వస్తున్నా, బూజు పట్టినట్లు కనిపించినా వాటిని వంటల్లోకి వాడకపోవడమే ఆరోగ్యానికి మంచిది.