నేటి ఉరుకుల పరుగుల జీవితంలో ప్రతి ఒక్కరూ ఏదో ఒక సమస్యతో సతమతమవుతున్నారు. ఒకరిని కెరీర్ ఆందోళన వేధిస్తుంటే.. మరొకరిని ఆర్థిక, ఆరోగ్య సమస్యలు ఉక్కిరిబిక్కిరి చేస్తున్నాయి. వీటన్నింటి వల్ల తీవ్రమైన మానసిక ఒత్తిడి (Stress) ఏర్పడుతోంది. అయితే, మన వంటింట్లో సులభంగా దొరికే 'పసుపు' కేవలం వంటలకు రంగు, రుచిని మాత్రమే కాదు.. మన శరీరానికి, మనసుకు అపారమైన ప్రశాంతతను, ఆరోగ్యాన్ని చేకూరుస్తుందని ఆయుర్వేద, ఆరోగ్య నిపుణులు చెబుతున్నారు. పసుపులో ఉండే ఔషధ గుణాలు ఎలాంటి మేలు చేస్తాయో తెలుసుకుందాం..
పసుపుతో..
పసుపులో ప్రధానంగా ఉండే 'కర్కుమిన్' (Curcumin) అనే మూలకం యాంటీ-డిప్రెసెంట్గా పనిచేస్తుంది. నిద్రపోయే ముందు గోరువెచ్చని పాలలో చిటికెడు పసుపు కలుపుకుని తాగడం వల్ల మెదడులోని నరాలు శాంతించి, ఆందోళన తగ్గి సుఖమైన నిద్ర పడుతుంది.
రోగనిరోధక శక్తికి బ్రహ్మాస్త్రం...
వాతావరణం మారుతున్న ప్రతిసారీ దాడి చేసే జలుబు, దగ్గు, ఇన్ఫెక్షన్లను ఎదుర్కోవడంలో పసుపు ఎంతగానో సహాయపడు తుంది. ఇందులో ఉండే యాంటీ-బాక్టీరియల్, యాంటీ-వైరల్ లక్షణాలు శరీరంలోని రోగనిరోధక వ్యవస్థను బలపరుస్తాయి.
నొప్పులకు చెక్..
రోజంతా పనిచేసి అలసిపోయినప్పుడు.. లేదా కీళ్ల నొప్పులతో బాధపడుతున్నప్పుడు పసుపు మంచి పెయిన్ కిల్లర్గా పనిచేస్తుంది. శరీరంలో వచ్చే వాపులను (Inflammation) తగ్గించడంలో ఇది అత్యుత్తమమైనది.
డిటాక్స్..
ఉదయం పరగడుపున గోరువెచ్చని నీటిలో కొద్దిగా పసుపు, నిమ్మరసం కలుపుకుని తాగడం వల్ల కాలేయం (Liver) శుభ్రపడుతుంది. శరీరంలో పేరుకుపోయిన మలినాలు బయటకు వెళ్లిపోయి, చర్మం కాంతివంతంగా మారుతుంది.
ఆయుర్వేదంలో పసుపు విశిష్టత..
భారతీయ సంప్రదాయంలో పసుపును అత్యంత పవిత్రమైనదిగా భావిస్తారు. ఇది స్వచ్ఛతకు, ఆరోగ్యానికి ప్రతీక. ఆయుర్వేద వైద్య విధానంలో శతాబ్దాలుగా పసుపును అనేక రుగ్మతల నివారణకు ఉపయోగిస్తున్నారు. పసుపు రంగును సానుకూల శక్తికి (Positive Energy) చిహ్నంగా పరిగణిస్తారు. అందుకే రోజువారీ జీవితంలో పసుపు వాడకం శారీరక ఆరోగ్యాన్ని మాత్రమే కాకుండా, మానసిక ఉల్లాసాన్ని కూడా పెంపొందిస్తుందని వైద్యులు సూచిస్తున్నారు.