హెల్త్ ఎక్స్ పర్ట్ : హెపటైటిస్-సి (Hepatitis C) రోగులకు భారీ ఊరటనిస్తూ భారత పేటెంట్ కార్యాలయం కీలక నిర్ణయం తీసుకుంది. ప్రముఖ అమెరికన్ ఫార్మాస్యూటికల్ సంస్థ 'అబ్బ్వీ' (AbbVie) ఆశించిన పేటెంట్ దరఖాస్తును భారత్ తిరస్కరించింది. హెపటైటిస్-సి చికిత్సలో కీలకమైన గ్లెకాప్రెవిర్/పిబ్రంటాస్విర్ (Glecaprevir/Pibrentasvir) కాంబో థెరపీపై గుత్తాధిపత్యం కోసం సదరు సంస్థ చేసిన ప్రయత్నాలకు బ్రేక్ పడింది.
ఈ నిర్ణయం వల్ల అంతర్జాతీయ మార్కెట్లో 'మావిరెట్' (Mavyret) బ్రాండ్ పేరుతో అమ్ముడవుతున్న ఈ ఖరీదైన మందు.. ఇకపై భారత్లో అత్యంత చౌకైన 'జెనరిక్' రూపంలో సామాన్య రోగులకు అందుబాటులోకి రానుంది.
అసలేం జరిగింది అంటే..?
అమెరికాకు చెందిన అబ్బ్వీ సంస్థ ఇప్పటికే ఈ కాంబో థెరపీపై ఉన్న హక్కులను మరింత కాలం పొడిగించుకునేలా, రెండో పేటెంట్ కోసం భారత పేటెంట్ కార్యాలయాన్ని ఆశ్రయించింది. అయితే, భారత పేటెంట్ చట్టంలోని సెక్షన్ 15 నిబంధనల ప్రకారం ఈ దరఖాస్తును అధికారులు తిరస్కరించారు. దీనిపై సదరు ఫార్మా సంస్థ ఎలాంటి అదనపు సాక్ష్యాధారాలను సమర్పించలేకపోయింది. చివరకు తన దరఖాస్తును ఉపసంహరించుకుంటున్నట్లు కంపెనీ ప్రకటించింది.
ప్రజారోగ్యానికి పెద్ద పీట..
భారతదేశం తీసుకున్న ఈ నిర్ణయాన్ని అంతర్జాతీయ ప్రజారోగ్య పరిరక్షణ సంస్థలు స్వాగతించాయి. థర్డ్ వరల్డ్ నెట్వర్క్ (TWN) ప్రతినిధులు ఈ తీర్పును ప్రశంసిస్తూ కీలక వ్యాఖ్యలు చేశారు.
"అనవసరమైన పేటెంట్ హక్కుల ద్వారా మార్కెట్లో గుత్తాధిపత్యాన్ని సృష్టించి, మందుల ధరలను సామాన్యుడికి అందనంత ఎత్తుకు తీసుకెళ్లే కార్పొరేట్ వ్యూహాలకు ఈ తీర్పు అడ్డుకట్ట వేసింది. భారతదేశ పేటెంట్ చట్టాల బలం, ప్రాముఖ్యతకు ఇది నిదర్శనం."-థర్డ్ వరల్డ్ నెట్వర్క్ (TWN).
జెనరిక్ మందులతో ప్రాణదానం..
హెపటైటిస్-సి కాలేయానికి సోకే ప్రమాదకరమైన వైరల్ ఇన్ఫెక్షన్. దీని చికిత్సకు ఈ కాంబో థెరపీ అత్యంత ప్రభావవంతంగా పనిచేస్తుంది.
ఒకవేళ అమెరికా కంపెనీకి పేటెంట్ దక్కి ఉంటే, మరే ఇతర సంస్థ ఈ మందును తయారు చేయడానికి వీలుండేది కాదు. దీనివల్ల మార్కెట్లో పోటీ లేక ధరలు విపరీతంగా పెరిగేవి. ప్రస్తుత నిర్ణయంతో భారతీయ జెనరిక్ ఫార్మా కంపెనీలు తక్కువ ధరకే ఈ ఔషధాన్ని తయారు చేసి మార్కెట్లోకి తెచ్చేందుకు మార్గం సుగమమైంది. ఫలితంగా వేలాది మంది రోగులకు తక్కువ ఖర్చుతోనే ప్రాణరక్షణ లభించనుంది.