తీపి తినాలనే కోరికను అణచుకోలేక, అలాగని తెల్ల చక్కెర వల్ల వచ్చే అనారోగ్య సమస్యలను భరించలేక సతమతమయ్యే వారి సంఖ్య రోజురోజుకూ పెరుగుతోంది. రసాయనాలతో శుద్ధి చేసిన రిఫైండ్ చక్కెర శరీరానికి స్లో పాయిజన్లా మారుతుండటంతో, ఇప్పుడు అందరి దృష్టి సహజసిద్ధమైన తీపి పదార్థాలపై పడింది. ‘రుచికి రుచి.. ఆరోగ్యానికి ఆరోగ్యం’ అందించే ప్రత్యామ్నాయాల కోసం అన్వేషణ మొదలైంది. మరి చక్కెరకు బదులుగా నిశ్చింతగా వాడుకోదగిన ఆ ప్రకృతి సిద్ధమైన మధుర పదార్థాలు ఏమిటి..? వాటిని ఏ పరిమాణంలో తీసుకోవాలి..? అనేది ఇప్పుడు తెలుసుకుందాం..
1. ఆర్గానిక్ బెల్లం (Jaggery)..
తెల్ల చక్కెరకు అత్యంత ప్రజాదరణ పొందిన ప్రత్యామ్నాయం బెల్లం. చక్కెరతో పోలిస్తే ఇందులో ఇనుము (Iron), పొటాషియం, మెగ్నీషియం వంటి ఖనిజాలు సమృద్ధిగా ఉంటాయి. ఇది జీర్ణక్రియను మెరుగుపరచడానికి, శరీరాన్ని డిటాక్స్ చేయడానికి సహాయపడుతుంది.
తీసుకోవాల్సిన పరిమాణం.. రోజుకు 1 నుంచి 2 చిన్న ముక్కలు అంటే సుమారు 5 నుంచి 10 గ్రాములు) తీసుకోవచ్చు. అంతకంటే ఎక్కువ తీసుకుంటే శరీరంలో క్యాలరీలు పెరుగుతాయి.
2. సహజసిద్ధమైన తేనె (Raw Honey)..
తేనెలో యాంటీఆక్సిడెంట్లు, యాంటీబాక్టీరియల్ గుణాలు పుష్కలంగా ఉంటాయి. ఇది రోగనిరోధక శక్తిని పెంచడానికి, గొంతు సమస్యలను తగ్గించడానికి తోడ్పడుతుంది. కాఫీ, టీ లేదా గోరువెచ్చని నీళ్లలో చక్కెర బదులు దీనిని వాడుకోవచ్చు.
తీసుకోవాల్సిన పరిమాణం.. ఒక ఆరోగ్యకరమైన వ్యక్తి రోజుకు 1 నుంచి 2 టీస్పూన్లు తేనెను నిశ్చింతగా తీసుకోవచ్చు.
3. ఖర్జూరం, ఖర్జూర పొడి (Dates, Date Powder)..
ఖర్జూరంలో ఫైబర్, పొటాషియం, విటమిన్లు ఎక్కువగా ఉంటాయి. ఇందులోని ఫైబర్ వల్ల రక్తంలో గ్లూకోజ్ స్థాయిలు చక్కెరలాగా ఒక్కసారిగా పెరగవు. పాయసాలు, స్వీట్లు, మిల్క్షేక్లలో చక్కెర స్థానంలో ఖర్జూర పేస్ట్ లేదా ఎండబెట్టిన ఖర్జూర పొడిని వాడుకోవచ్చు.
తీసుకోవాల్సిన పరిమాణం..రోజుకు 2 నుంచి 3 ఖర్జూర పండ్లు లేదా 1 నుంచి 2 టేబుల్ స్పూన్ల ఖర్జూర పొడి సరిపోతుంది.
4. స్టీవియా (Stevia / మధుపత్రి)..
మధుమేహం ఉన్నవారికి, బరువు తగ్గాలనుకునే వారికి స్టీవియా ఒక అద్భుతమైన వరం. ఇది ఒక మొక్క ఆకుల నుండి తయారవుతుంది. ఇందులో సున్నా క్యాలరీలు, జీరో కార్బోహైడ్రేట్లు ఉంటాయి. కాబట్టి ఇది రక్తంలో షుగర్ స్థాయిలపై ఎలాంటి ప్రభావం చూపదు.
తీసుకోవాల్సిన పరిమాణం.. స్టీవియా సాధారణ చక్కెర కంటే చాలా రెట్లు ఎక్కువ తీపిని కలిగి ఉంటుంది. కాబట్టి రోజువారీ టీ లేదా కాఫీలో కేవలం 1 లేదా 2 చుక్కల లిక్విడ్ లేదా ఒక చిటికెడు పొడి సరిపోతుంది.
5. కొబ్బరి చక్కెర (Coconut Sugar)..
కొబ్బరి చెట్టు పువ్వుల రసం నుంచి దీనిని తయారు చేస్తారు. సాధారణ చక్కెరతో పోలిస్తే దీని గ్లైసిమిక్ ఇండెక్స్ (GI) తక్కువగా ఉంటుంది. అంటే ఇది రక్తంలో గ్లూకోజ్ స్థాయిలను నెమ్మదిగా పెంచుతుంది. ఇందులో ఐరన్, జింక్, కాల్షియం వంటి పోషకాలు కొద్ది మోతాదులో ఉంటాయి.
తీసుకోవాల్సిన పరిమాణం..దీనిని కూడా రోజుకు 1 నుంచి 2 టీస్పూన్లకు మించకుండా తీసుకోవడం మంచిది.
స్టీవియా మినహా బెల్లం, తేనె, ఖర్జూరాలలో కూడా సహజసిద్ధమైన గ్లూకోజ్, ఫ్రక్టోజ్, క్యాలరీలు ఉంటాయి. కాబట్టి, ఇప్పటికే మధుమేహం ఉన్నవారు వీటిని తీసుకునే ముందు తప్పనిసరిగా తమ వైద్యుల సలహా తీసుకోవాలి. సాధారణ వ్యూహం ఏమిటంటే, చక్కెరకు బదులు వీటిని వాడుతున్నప్పటికీ.. క్రమంగా తీపి తినే అలవాటును తగ్గించుకోవడమే నిజమైన ఆరోగ్యం..!